Pas ShBA-së, edhe Franca ka bërë kritika për Organizata Botërore e Shëndetësisë në lidhje me menaxhimin e situatës me pandeminë e koronavirusit.
Franca shtoi presionin të mërkurën ndaj udhëheqjes së agjencisë së Kombeve të Bashkuara, nëpërmjet ministrit të saj të Jashtëm, Zhon-Iv Lë Drion.
“Pa dyshim që duhen thënë disa gjëra për funksionimin e OBSH-së, për një lloj mangësie në reagim, për autonominë kundrejt shteteve, ndoshta edhe për diktimin dhe përçimin e informacioneve. Ky është një problem i brendshëm i organizatës dhe mendoj se kriza aktuale duhet të na bëjë ta rishohim rolin e çdo institucioni të rëndësishëm që kemi sot,” deklaroi kryediplomati francez Lë Drio gjatë një seance në komisionin e jashtëm të Senatit.
Franca një ditë më parë, megjithatë e qortoi propozimin e qeverisë amerikane, për t’i pezulluar qindra milionë dollarë fonde për agjencinë globale të shëndetit publik.
