Shkrimtari i njohur kilian Luis Sepulveda ishte i shtruar që në muajin shkurt në një spital në Oviedo pas infektimit me Covid-19. Ai ka ndërruar jetë ditën e sotme në moshën 70-vjeçare. Shumë prej veprave të tij janë të përkthyera edhe në gjuhën shqipe.
Kush ishte Luis Sepulveda?
Lindi në veri të Kilit në 1949, u detyrua të braktiste atdheun për shkak të përfshirjes së tij në aktivitetet politike gjatë lëvizjeve studentore, e cila përfundoi në burgosje nga regjimi i gjeneralit Pinoçet. Për shumë vite udhëtoi nëpër Amerikën Latine dhe Europë, duke punuar në vende të ndryshme. Që nga 1997 Sepúlveda ka jetuar në Gijon, Spanjë. Ky autor ka fituar çmime të panumërta letrare.
“Letërsia është mënyra më e mirë për të zhdukur kufijtë, për të harruar, për të bërë të mundur që njeriu të udhëtojë lirisht në territoret e imagjinatës, në atë territor që nuk njeh as kufij as atdhe”.
Idealit të një letërsie si mision – në mbrojtje të më të dobtëve, të të harruarve të kësaj bote të plagosur – nga këto është frymëzuar Luis Sepúlveda, i konsideruar tashmë si një autor mit i letërsisë amerikano-jugore.
Disa nga libra të tij të përkthyer dhe në shqip janë :
“Plaku që lexonte romane dashurie” i përkthyer në pesëdhjetë gjuhë, i solli famën ndërkombëtare. “Bota në fund të botës”, “Historia e një pulëbardhe dhe maçokut që i mësoi si të fluturonte”, “Ditari i një vrasësi sentimental”, “Çmenduria e Pinoçetit”, “Hija e asaj çfarë ne ishim”, “Takim dashurie në një vend lufte”, “Historia e një balene të bardhë treguar nga vetë ajo” etj.
