Presidenti i Federatës Italiane të Futbollit, Gabriele Gravina, siguron të gjithë se nuk do të heqë dorë nga përfundimi i sezonit aktual dhe pretendon se i gjithë sistemi do të përfitonte nga rikthimi i futbollit.
Me futbollin Europian në një kaos total, presidenti ka qetësuar të gjithë palët rreth frikës që sezoni nuk do të mund të përfundojë. Gjithsesi, 66-vjeçari ka deklaruar se futbolli do të rikthehet vetëm atëherë kur të jenë krijuar kushtet e duhura.
“E respektoj shkencën, por unë nuk mund të heq dorë. Ne po punojmë për të gjetur mënyrën si të përfundojmë sezonin jo se kur do të luhet. Kur Italia t’i rikthehet përsëri jetës pak a shumë normale dhe kur kushtet e përshtatshme të krijohen, do të rinisim sërish kampionatin”.
“E them dhe do ta them gjithmonë, Serie A duhet të përfundojë, ka akoma kohë. Qeveria, Liga, Federata do të punojnë së bashku dhe do të vendosim në mënyrë të përgjegjshme. I gjithë sistemi ynë do të përfitonte nga ristartimi i futbollit. Sezoni i ri nuk do të fillojë pa mbaruar ai aktual”. – ka thënë Gravina për “La Repubblica”.
