Një tjetër paciente ka ndërruar jetë në spitalin Infektiv, duke e çuar në 25 numrin e personave që kanë vdekur nga Covid-19.
Pacientja, 62 vjeç, mësohet se është nga Shkodra dhe vuante nga sëmundje bashkëshoqëruese.
Mësohet se pacientja vuante nga pankreasi dhe astma bronkiale.
Ajo ishte në gjendje të rëndë shëndetësore, në terapi intensive dhe e intubuar.
E ndjera ishte e shtruar në spitalin e Shkodrës për shkak të sëmundjeve të mëparshme dhe dyshohet se është infektuar nga një infermiere me Covid-19.
Por Ministria e Shëndetësisë në një reagim shprehet se pacientja nga Shkodra ka vdekur nga një sëmundje e rëndë e pankreasit, sikundër konfirmon se ajo ishte e infektuar me Covid-19.
