Gjykata e Posacme kundër Korrupsionit dhe Krimit të Organizuar ka pranuar kërkesën e SPAK për zgjatjen e afateve të paraburgimit për 6 të arrestuar lidhur me grabitjen e ndodhur në Rinas.
Kështu hetimet ndaj të arrestuarve zgjaten edhe me 2 muaj e 15 ditë.
Lidhur me grabitjen e ndodhur në Rinas më 9 prill të vitit të kaluar, u arrestuan shtetasit Oltion Veseli, Alkon Bengasi, Ragim Hajdini, Renaldo Sula, Elton Pikli dhe Saimir Cela.
Super-grabita ka ndodhur rreth orës 15:00, të datës 9 prill 2019, brenda në pistën e aeroportit të Rinasit, ku u morën rreth 10 milionë euro. Policia e vënë në ndjekje të autorëve, ka mundur të vrasë një nga grabitësit, rreth 2 kilometra larg aeroportit, në rrugën e Hurmave, pasi ata kishin marrë paratë nga 4 makina blind të transportit të parave të 4 kompanisë të ndryshme private.
Autorët e tjerë kanë mundur të largohen, ndërsa është kapur edhe një furgon me mbishkrimin të falsifikuar “Hetimi Tatimor” që autorët përdorën për të kryer grabitjen. Dhe duket se pikërisht ky furgon dhe kamuflimi i grabitësve të ketë qenë “mburoja” e tyre për të hyrë në aeroport.
Policia tha se grabitësit kanë hyrë duke thyer derën e rrethimit që përdoret nga shërbimet zjarrfikëse. Ata dyshohet të kenë pasur informacion për vlerat monetare të bankave të nivelit të dytë që do të niseshin nga Shqipëria me avion për në Vjenë, ndërkohë që dyshohet të ketë pasur edhe bashkëpunëtorë të brendshëm në aeroport.
Autorët kanë mundur të shkojnë deri në barkun e avionit me pasagjerë që nisej për në Vjenë, aty ku në pjesën e bagazheve kanë bërë grabitjen teksa paratë kalonin nga makinat e blinduara për në avion.
