Bernardo Silva, ka zbuluar se ishte ideja e Cristiano Ronaldos që skuadra e Portugalisë, të dhurojë 50 përqind të bonusit të tyre të kualifikimit për Euro 2020, për të ndihmuar gjatë pandemisë së koronavirusit.
Skuadra portugeze mori bonusin si rezultat i kualifikimit të skuadrës në Euro 2020, që tashmë është shtyrë për vitin e ardhshëm.
Gjatë një interviste për mediat angleze, biseda ishte përqendruar se si Kyle Walker, shok i skuadrës te Man.City, ndonjëherë e fshinte Silva-n nga grupet e krijuara në WhatsApp. Më pas i pyetur se si sillet Ronaldo në këtë rrjet social, Silva ka thënë:
“Ronaldo është tip i qetë, ai para dy-tre ditësh dha idenë që të dhurojmë 50 për qind të shpërblimit tonë. U kualifikuam në Europian dhe tani do zhvillohet në vitin 2021. Kështu ai dha idenë dhe ka qenë shumë aktiv për këtë gjë, duke na dërguar mesazhe të gjithëve, por jo duke i larguar njerëzit si Kyle”, – raporton “The Sun”.
Ky shpërblim do të shkojë në fondin e krijuar nga Federata e Futbollit të Portugalisë për të ndihmuar klubet dhe lojtarët jo-profesionistë, financat e të cilëve janë në krizë për shkak të pandemisë COVID-19.
