Ivan Rakitiç prej kohësh është përfolur për një largim të mundshëm nga skuadra e Barcelonës. Dikur pjesë e formacionit titullar dhe një ndër lojtarët kryesorë, tashmë kroati e ndjen veten të padëshiruar në “Camp Nou”.
Së fundmi duke folur për “Mundo Deportivo” për të ardhmen e tij , 32-vjeçari ka deklaruar se dëshiron të luajë për një ekip ku ndihet i vlerësuar dhe i dobishëm.
“Të ardhmen time e vendos unë. Nuk jam një thes me patate. Dua të luaj në një klub ku më duan dhe vlerësojnë, aty ku edhe familja ime ndihet mirë. E kam thënë përherë që Barcelona është vendi perfekt, por dua të zbavitem dhe të ndihmoj skuadrën, gjë që nuk po e bëj aktualisht.
“Pjesa e parë e sezonit ishte e çuditshme, ishte shumë befasuese në aspektin negativ. Gjithmonë mund të mësosh nga situata të tillë, duhet ta bësh një gjë të tillë dhe të përmirësohesh. Nuk duhet të tentosh t’i kuptosh disa gjëra që ndodhin, thjeshtë duhet t’i pranosh”.
E ardhmja? Do të vendos për atë që është më e mira për mua dhe familjen. Kam një dashuri të veçantë për Sevillan, do të ishte një ëndërr e madhe ta vishja përsëri atë fanellë. Por, nuk varet nga unë, Monchi dhe Sevilla e kanë numrin tim të telefonit. Nuk më kanë telefonuar, para pak kohësh kisha edhe ditëlindje “, përfundon Rakitic.
