Ditën e sotme të gjithë besimtarët katolikë në mbarë botën festojnë Pashkët, që simbolizon dhe ringjalljen e Krishtit.
Mirëpo këtë vit, si asnjëherë më parë, në të gjitha vendet, meshat po zhvillohen pa praninë e besimtarëve, në respekt të masave të marra nga qeveritë, për distancimin fizik që duhet të kenë njerëzit me njëri tjetrin, për shkak të koronavirusit.
Kjo ka ndodhur dhe në Tiranë, Shkodër, Leshë, apo në qytete të tjera të Shqipërisë, ku qytetarët janë mbyllur më së shumti në shtëpitë e tyre, e kanë uruar njëri tjetrin për së largu, me shpresën se këto ditë të vështira për vendin do të marrin fund së shpejti.
Meshën në Katedralen e Shën Pjetrit në Tiranë e drejtoi Imzot George Frendo, i cili tha se një situatë të tillë e kishte parë vetëm në vitin e largët 1997.
“Ndërsa zakonisht ju takoj në këtë kishë katedrale sonte nëpërmjet televizorit. Cdo vit kremtojmë festën e Pashkëve, por në një situatë të ndryshme.
Më kujtohet kur kam kremtuar pashkët për herë të parë në Shqipëri, marsi i 1997, gjatë kremtimit kam parë disa besimtarë duke qarë, por unë kujtova fjalët e Jezusit, që ai tha pak orë para se ushtarët ta kapnin për ta çuar drejt kryqit u tha apostujve, ju do të hidhëroheni, por hidhërimi juaj do të kthehet në gëzim.
Kur gruaja është duke lindur hidhërohet, se i erdhi ora e lindjeve, por kur lind foshnja, ajo e harron vuajtjen nga gëzimi se ka sjellë një njeri në botë. Sot po bëjmë shumë sakrifica por le të hedhim me shpresë një shikim drejt një të ardhmeje që do të kurorëzojë të gjitha sakrificat që po bëjmë këto ditë”, tha ai. /Faxnews/
