Armëpushimi 30-orësh për të dielën e Pashkëve mes Rusisë dhe Ukrainës nuk u respektua plotësisht dhe të dyja palët akuzuan njëra-tjetrën për shkelje. Armëpushimi u shpall papritur e njëanshëm nga Presidenti rus, Vladimir Putin më 19 Prill. Megjithatë, të dyja palët raportuan për sulme të dielën e Pashkës.
Autoritetet ruse raportuan për të paktën tri shpërthime në rajonin e pushtuar të Donjeckut, në lindje të Ukrainës, mëngjesin e 20 prillit. Ministria ruse e Mbrojtjes pretendoi se Kievi gjatë natës kreu 48 sulme me dronë ndaj objektivave në Rusi dhe në territoret e pushtuara.
Presidenti ukrainas, Volodymyr Zelensky, deklaroi të dielën se forcat ruse kanë vazhduar bombardimet dhe sulmet përgjatë vijës së frontit, pavarësisht fjalëve boshe të Putinit për një armëpushim të shkurtër me rastin e Pashkës.
Ndonëse pati thirrje për zgjatjen e armëpushimit përtej të dielës së Pashës, Kremlini refuzoi.
Ndërkohë vëmendja do të zhvendoset në Londër këtë javë ku zyrtarët amerikanë, europianë dhe ukrainas kanë rënë dakord të takohen për të vazhduar diskutimet mbi luftën në Ukrainë. Takimin e Londrës e njoftoi presidenti francez Emmanuel Macron, pas takimit të së enjtes të diplomatëve të lartë në Paris.
Sekretari amerikan i Shtetit Marco Rubio tha se bisedimet ishin konstruktive. Por një ditë më vonë, ai shkaktoi shqetësim kur tha se ShBA-ja mund të “tërhiqet” nëse negociatat e paqes nuk japin rezultat.
“Ne nuk do të vazhdojmë të fluturojmë në të gjithë botën dhe të bëjmë takim pas takimi pas takimi nëse nuk do të ketë përparim,” tha Rubio.
Më vonë qëndrimin e tij e përsëriti dhe presidenti Trump i cili deri më tani ka thënë se është politikani i vetëm në botë që mund t’i japë fund luftës.
