Pesë persona janë vënë në pranga në 24 orët e fundit nga uniformat blu, në zbatim të masave kufizuese për vënien në kontroll të pasojave që sjellin përhapjen e COVID-19.
Në Tiranë janë arrestuar shtetasit E. Q. dhe R. B., pasi janë kapur duke drejtuar mjetet pa lejen përkatëse të drejtimit.
Autoritetet njoftojnë se në kryeqytet është prangosur dhe shtetasi A. G., pasi drejtonte mjetin në gjendje të dehur dhe pa autorizim lëvizjeje, si dhe i ka paraqitur punonjësve të Policisë mjetin e identifikimit të një shtetasi tjetër.
Në Durrës janë arrestuar shtetasit O. P. dhe M. P. pasi akuzohen për veprat penale “Kundërshtim i punonjësit të policisë” dhe “Goditje për shkak të detyrës”.
“Kur punonjësit e Policisë u kanë kërkuar autorizimin e lëvizjes, të cilin ata nuk e kishin, dhe më pas mjetin identifikues për plotësimin e masës administrative, këta shtetas nuk kanë pranuar dhe i kanë fyer dhe kundërshtuar me dhunë punonjësit e Policisë.” – thuhet në njoftimin e bluve.
