Ka përfunduar keq një lojë pokeri e 5 personave në qytetin e Pogradecit, pasi policia i zbuloi dhe i procedoi penalisht dhe administrativisht për shkelje të orarit të ndalimit të lëvizjes dhe vënien në dispozicion të ambienteve për të ushtruar aktivitetin e kundërligjshëm të lojërave të fatit.
Shërbimet e Komisariatit të Policisë Pogradec, në vijim të kontrolleve të ushtruara për monitorimin e zbatimit të masave shtesë për parandalimin e përhapjes së COVID-19, si dhe për evidentimin dhe goditjen e paligjshmërisë, në lagjen nr. 1, në lokalin e shtetasit A. B., 35 vjeç, kanë konstatuar shtetasit E. K., 34 vjeç, F. B., 34 vjeç, S. B., 27 vjeç dhe V. K., 23 vjeç, banues në Pogradec, duke luajtur lojëra fati të palejuara.
Më rëndë nga kjo ngjarje e pësoi pronari i lokalit, i cili u gjobit për hapjen e lokalit në orarin e palejuar të karantinës dhe u procedua penalisht për organizimin e lotarive të paligjshme.
Bazuar në Aktin normativ pronari i lokalit u ndëshkua me masë administrative në vlerën 1 milion lekë, ndërsa 4 të tjerët në vlerën 10.000 lekë të reja.
