Orgest Bilbili është personi që ka mbetur i plagosur mesditën e sotme pranë shkollës “Nikel Dardan” në Tiranë.
Bilbili prej 3 vitesh ishte shpallur në kërkim, madje në kërkim ndërkombëtar.
Bilbili u plagos nga një efektiv i repartit Shqiponja, pasi fillimisht i kërkoi lejen e daljes dhe kartën e identitetit. Por, Bilbili ëhstë larguar me vrap, ndërsa efektivi i policisë e ka ndjekur nga pas.
Në një përballje të dytë mes tyre, Bilbili i ka drejtuar një armë efektivit të policisë, ndërsa ky i fundit ka qëlluar në drejtim të tij, duke e plagosur në këmbë.
Gjithashtu e plagosur ka mbetur edhe një kalimtare e rastit.
Po kush është Orgest Bilbili?
Ai dyshohet për atë që njihet si masakra e Lushnjes, ku mbetën të vrarë dy persona dhe u plagosën dy të tjerë.
Ngjarja ka ndodhur në 11 shtator 2017 dhe prej atëherë, Orgest Bilbili ishte i shpallur në kërkim.
Forcat operacionale të Policisë së Shtetit, Renea dhe FNSH kanë organizuar disa operacione për arrestimin e Bilbilit, por pa arritur t’a kapin.Gjithashtu për masakrën e Lushnjes është akuzuar edhe Laert Haxhiu.
Laert Haxhiu është akuzuar dhe si autor i vrasjes së 29 vjeçarit Gerti Lala.
Ngjarja ku i riu që njihej me nofkën “Iriqi” mbeti i vrarë, ndodhi më 8 korrik të vitit 2010. Për këtë krim, Laert Haxhiu u dënua me 32 vjet burg, por me vendim të Gjykatës së Apelit ai u lirua pas tri vitesh. Lirimi i tij u argumentua me mungesën e provave.
Pasi doli nga burgu në fund të 2014-s, ai u arrestua sërish në qershor të vitit 2015 në Durrës, për trafik heroine, gjatë operacionit të koduar “Smart”, ku u sekuestrua një sasi prej 1.2 kg heroinë.
Ndërkaq, bashkëpunëtori i Haxhiut në vrasjet Lushnjë në 2017, Orges Bilbili, rezulton se është dënuar me 7 vite e 4 muaj burgim për trafikim lëndësh narkotike. Bashkë me Haxhiun, Orges Bilbili është i dyshuar edhe për atentatin, ku u plagosën Xhulio Shkurti (nipi i Aldo Bares) dhe Sajmo Xhelili.
Bashkë me dy të plagosurit ka qenë edhe Zamir Latifi, i cili asokohe nuk pësoi plagë.
