Gazetari Klodian Tomorri e cilëson të gabuar mënyrën sesi u targetuan përfituesit e paketës financiare të qeverisë për situatën e pandemisë. Për Tomorrin, targetimi i punonjësve ka lënë jashtë skemës një numër të madh njerëzish dhe vetë paketa financiare nuk kryen funksionin për të cilin është ndërtuar: shmangien e një krize humanitare.
“Problemi i skemës dhe paketës financiare të qeverisë është më i madh sesa thjesht skualifikimet e mijëra punëtorëve që nuk arrijnë të përfitojnë pagën e luftës. Në të gjitha skemat ka një arsye pse bëhet, të shmangësh një krizë humanitare pra është një objektiv humanitar. Ky objektiv nuk mund të adresohej siç zgjodhi qeveria. Ajo targetoi punëtorët por jo vetëm ata janë prekur nga kjo situatë. Duheshin targetuar familjet. Qeveria mund të kishte bërë politikë duke u nisur nga kjo, mund të përjashtoheshin familje me një të punësuar në shtet, me pensionistë, mund të vihej një limit. Nëse do të zgjidhej kjo skemë, do të kishim një targetim më të mirë. Kjo skemë ka për të lënë jashtë shumë familje që janë prekur nga kriza dhe nuk kanë mundësi të financojnë shpenzimet e mbijetesës. Kjo do të kthehet në bumerang dhe në këto kushte, askush nuk do ta respektojë më karantinën”, tha ai.
Në studion e lajmeve të TvT, nëpërmjet një lidhjeje me Skype, Tomorri analizoi arsye pse rreth 15 mijë punonjës nuk kanë arritur të përfitojnë atë që kryeministri e ka cilësuar si paga e luftës.
“Janë një sërë arsyesh që janë vendosur në aktin normativ të qeverisë, që përcaktojnë kriteret. Janë arsye që janë edhe jo logjike. P.sh. është vënë si arsye fakti që, nëse biznesi ka lëshuar kupon një datë pas urdhrit për mbylljen e aktiviteteve, nuk përfiton. Nëse urdhri u dha më 10 mars dhe një biznes ka lëshuar kupon më 11 mars, ai skualifikohet. Një tjetër arsye është ajo e bizneseve që mund të kenë pasur detyrime tatimore të pashlyera ndaj administratës. Mendoj se janë të gabuara, sepse paketa është një paketë sociale. Pra qeveria po bën politikë sociale për të mbrojtur njerëzit, për të shmangur një krizë humanitare dhe nuk mund ta lidhësh me detyrime tatimore. Këto të fundit mund t’i kërkosh në një kohë tjetër. Një biznes në listën e qeverisë mund të jetë i hapur, por pavarësisht kësaj ai nuk ka klientelë për shkak të karantinës, sepse njerëzit nuk dalin”, tha ai.
