Kryeministri Edi Rama njoftoi sot miratimin e 9 500 pagave të para për bizneset e vogla, në kohën kur vendi po përballet me koronavirusin që ka shkaktuar 22 viktima dhe 377 të infektuar.
Rama tha se deri në fund të javës do të miratohen 60402 paga lufte.
“Aplikimet bëhen në faqen online të Drejtorisë së Tatimeve, pastaj bëhet verifikimi, miratimi dhe lëvrimi. Lëvrimi i 9500 pagave të para të miratuara sot nis nesër dhe kështu vazhdon deri në fund të javës”, tha Rama.
Sipas tij, do përfitojnë nga kjo pagë edhe rrobaqepësitë e vogla në lagje, agjencitë turistike, servise makinash, llamarinistë, riparim pajisjesh elektroshtëpiake, fizioterapistë.
“Këto janë de facto të mbyllura, jo me vendim, por sepse në kushtet e izolimit nuk kanë punë, pasi askush nuk shkon atje. Kjo kategori do të futen në kategorinë që do të përfitojnë nga zgjerimi i paketës pas datës 15 prill”, deklaroi Rama.
