Skënder Kurti, ish-trajneri i kombëtares së boksit, ka ndërruar jetë në spitalin Infektiv në Tiranë. 61-vjeçari, i cili prej disa ditësh ndodhej në gjendje të rëndë shënon viktimën e 21 nga koronavirusi.
Kurti ishte në gjendje të rëndë shëndetësore, madje pak ditë më parë pësoi edhe një vdekje klinike, por arriti të rikthehej në jetë.
61-vjeçari kaloi vdekje klinike në 23 mars, dhe u raportua nga Ministria e Shëndetësisë si viktima e pestë e koronavirusit në Shqipëri.
Por mjekët arritën ta mbajnë në jetë edhe për rreth 12 ditë, derisa sot ndërroi jetë në spitalin Infektiv.
Kurti ishte një nga pacientët e intubuar, ndërsa gjendja e tij shëndetësore u përkeqësua në ditën e 6 të shtrimit në spital.
