Avokati i njohur Ledio Braho ka reaguar lidhur me situatën absurde të krijuar në Pikat e Kalimit Kufitar të Kakavijës dhe Kapshticës, ku qytetarë shqiptarë ndodhej në atë që quhet kufiri i gjelbër, pasi autoritetet shqiptare nuk i lejojnë të futen në atdheun e tyre.
Policia në doganën greke i ka lejuar të kalojnë, ndërsa policia shqiptare nuk ka dhënë dritë jeshile, çka ka detyruar disa dhjetra shqiptarë, të kalojnë natën në temperatura të ulëta në kufirin e gjelbër.
Përmes një postimi në rrjetet sociale, avokati Braho i kujton Qeverisë detyrimet kushtetuese ndaj shtetasve shqiptarë.
“Pika 2 e nenit 3 të Protokollit Nr. 4 të KEDNj është detyrim i qartë për shtetin shqiptar. Të gjithë shqiptarët duhet të lejohen të futen në territorin shqiptar.
Nëse shteti ka për qëllim shmangien e “bombës”, t’i karantinojë në një ambient të përbashkët në menyrë që t’i sigurojë ushqim dhe strehim.
Nuk është zgjidhje shmangia e gjobave për kalimin e afatit 90 ditor (as kjo nuk po ndodh) sepse në këtë kohë nuk është gjoba, por mbijetesa qëllim”, shkruan Braho.
