Policia ka ndëshkuar me gjobë 700.000 lekë, një shtetas, në Tiranë, pasi ka shkelur rregullat e vetëkarantinimit.
Gjithashtu në 24 orët e fundit janë ndëshkuar dhe 33 drejtues mjetesh, 225 këmbësore dhe 9 njësi tregtie në zbatim të masave kufizuese për vënien në kontroll të pasojave që sjellin përhapjen e COVID-19.
Burime zyrtare bëjnë me dije se 33 drejtues mjetesh janë ndëshkuar me heqje të lejes së drejtimit dhe bllokim mjeti, pasi kanë shkelur urdhrin e ndalim qarkullimit. Ndërsa 223 shtetas janë konstatuar nga shërbimet e Policisë duke lëvizur në këmbë apo me biçikleta, pa ndonjë arsye apo emergjencë dhe janë ndëshkuar me 10.000 lekë gjobë.
Ndërsa dy shtetas të tjerë janë ndëshkuar me 20.000 lekë gjobë dhe bllokim mjeti për 3 muaj, pasi nuk kanë zbatuar urdhrin për kufizimin e lëvizjeve në parqe dhe zona të gjelbra të hapura, në zonat urbane apo mjedise të tjera publike të hapura.
Në të gjithë vendin janë konstatuar dhe 9 njësi tregtie që nuk kanë zbatuar orarin e mbylljes dhe ndaj administratorëve është marrë masa administrative, në bazë të nenit 3, pika 7 e Aktit Normativ Nr. 3, datë 15.03.2020.
Policia apelon për qytetarët se nuk do të lejohet asnjë këmbësor të dalë për shëtitje, aktivitet sportiv apo për motive të tjera, përveç emergjencave mjekësore dhe atyre që shkojnë në punë, të cilët duhet të kenë me vete kartën e identitetit dhe vërtetimin e punës nga punëdhënësi.
Për të bërë pazar në qendrat urbane, një pjesëtar i familjes duhet të aplikojë në e-Albania apo në numrin falas 55155, për t’u pajisur me autorizim, ndërsa pensionistët nuk lejohen në mënyrë kategorike të dalin nga banesa.