Policia e Shkodrës ka vënë në pranga një 42-vjeçar, pasi përdorte dokument të falsifikuar për të qarkulluar gjatë orarit për qëndrim në banesë, në kuadër të masave kufizuese për mospërhapjen e COVID-19.
Personi i arrestuar është shtetasi Z. Gj. banues në Tale, Lezhë.
Në vendin e quajtur Shtoj i Ri, Shkodër, ky shtetas duke drejtuar mjetin tip Audi, u ndalua nga shërbimet e Policisë për kontroll të autorizimit për lëvizje. 42-vjeçari u ka paraqitur punonjësve të Policisë një dokument dhe distinktiv të “Europolice”. Nga verifikimet paraprake me Europolin rezulton se dokumentet ishin të falsifikuara, njofton Policia.
Gjithashtu është ndëshkuar edhe pasagjeri, me masë 10.000 lekë, për thyerje të rregullit të ndalimit të lëvizjes për këmbësorë pas orës 13:00, pa ndonjë aryse.
Materialet iu referuan Prokurorisë së Rrethit Gjyqësor Shkodër, për veprat penale “Falsifikimi i dokumenteve” dhe “Përvetësimi i titullit apo i detyrës shtetërore”.
