Infermierja italiane, e cila tre javë më parë u bë simbol në luftën kundër COVID-19, është shëruar nga koronavirusi.
Fotoja e Elenas, e cila punonte në spitalin e Cremona, me kokën mbështetur mbi një tastierë kompjuteri, e veshur me doreza, këmishën e punës, bëri xhiron e botës duke i përlotur të gjithë.
Pesë ditë pas publikimit të fotos, infermierja 43 vjecare rezultoi pozitive ndaj testit të koronavirusit. Por sot, 17 ditë më pas ajo është shëruar.
Lajmin e ka dhënë spitali ku qëndronte e shtruar Elena, e cila nga testet rezultoi negative.
“Jam shumë mirë, falë Zotin nuk kam as një lloj shqetësimi, mezi po pres të kthehem tek kolegët e mi dhe profesioni im që e adhuroj”, tha infermierja 43-vjeçare.
“Fotoja e Elenës, është një shkrepje nga jeta reale, është impenjim dhe sakrificë dhe ka prekur zemrat e të gjithëve. Është një foto që portretizon dashurinë për jetën dhe përpjekja për ta mbrojtur atë.
Në një foto shfaqet i gjithë njerëzimi i kësaj gruaje. Faleminderit, faleminderit atyre që nuk heqin dorë kurrë”- shkruan në rrjetet sociale, ministri i jashtëm italian, Luigi Di Maio, pas lajmit të shërimit të Elenas.
