Në Shqipëri janë konfirmuar 123 raste me koronavirus, ndërsa harta e përhapjes së tij ka përfshirë edhe Shkodrën, Lezhën e Hasin.
Një pjesë e personave që rezultojnë të prekur nga Covid-19 janë punonjës të institucioneve shtetërore. Kjo do të thotë se kolegët e tyre duhet të vetëkarantinohen.
Në Shkodër ka rezultuar pozitiv një oficer i policisë gjyqësore, ndërsa dyshohet se personi është infektuar nga një shtetas që ishte nën hetim dhe dosja e tij ishte në duart e oficerit.
Sikundër raportohet, Prefekti i Shkodrës ka kërkuar vetëkarantinimn deri më 31 mars të punonjësve të Prokurorisë së Shkodrës.
Në Lezhë, një infermiere e ambulancës në këtë qytet rezulton e prekur nga Covid 19. E prekura me koronavirus ende nuk dihet nga mund ta ketë marrë infiktimin, por menjëherë janë marrë masa për të izoluar edhe kolegët e saj nga frika se mund të jenë infektuar.
54 vjeçarja është derguar mbrëmë tek Infektivi në Tiranë, dhe pritet që në bazë të gjendjes së saj të vendoset nëse do qëndrojë tek spitali për terapi intensive ose do vetëkarantinohet në shtëpi.
Pas lajmit, është dezinfektuar dhe mbyllur qendra shëndetësore e lagjes “Skënderbeg” në Lezhë.
Personeli mjekësor kishte patur kontakte të vazhdueshme me infermieren që u infektua me COVID 19.
Gjithashtu dogana e Tushemishtit në Pogradec është vendosur në karantinë ku të paktën 24 persona janë vetëkarantinuar.
Në Korçë, gjithashtu një punonjëse e Kadastrës rezultoi pozitive me Covid 19, çka ka detyruar 53 punonjësit e institucionit të vetëkarantinohen.
Në Tiranë ka rezultuar me Covid 19, Drejtori i Urgjencës Kombëtare, i cili është edhe anëtar i Task Force kundër koronavirusit. Ende nuk ka të dhëna nëse kolegë të doktor Bratajt do të vetëkarantinohen.
