Këshilli Europian pritet të miratojë sot në parim hapjen e negociatave për Shqipërinë dhe Maqedoninë e Veriut. E ndërsa në rastin e Maqedonisë së Veriut pritet të ketë një datë konkrete, për Shqipërinë kjo datë do të jetë në varësi të plotësimit të kushteve që janë vendosur nga Bundestagu gjerman, por edhe nga Greqia në raport me minoritetet.
Në total, Shqipërsisë i janë vendosur 12 kushte, një pjesë e të cilave kanë të bëjnë me ndjekjet penale ndaj korrupsionit në nivele të larta, personave që janë implikuar në manipulimin e zgjedhjeve, gjyqtarët dhe prokurorët e akuzuar për korrupsion etj.
Lidhur me vendimin e pritshëm, kreu demokrat Lulzim Basha përmes një postimi në rrjet shkruan se në këto ditë të vështira për Shqipërinë dhe mbarë Botën, nevoja për shpresë është edhe më e madhe.
“Mirënjohje @EPPGroup për mbështetjen. Në emër të PD dhe Opozitës së Bashkuar rikonfirmoj kërkesën tonë ndaj Këshillit Europian të miratojë në parim hapjen e negociatave për Shqipërinë.
Megjithë shtimin e kushteve deri në hapjen e tyre, ne mbështesim këtë proces jetik për shqiptarët. PD dhe Opozita e Bashkuar do të të punojë që ta bëjmë realitet hapjen e negociatave përmes zbatimit të 9 kushteve të @Bundestag dhe kushteve të reja shtesë të vendeve të tjera”, shkruan Basha.
