Në Kinë, shtetin ku besohet se lindi koronavirusi i ri, ka persona të shëruar që po preken për herë të dytë nga virusi. Tu Yuanchao, zv/drejtori i komisionit shëndetësor në provincën Hubei, tha se ata që testohen pozitiv dhe shfaqin simptoma të koronavirusit për herë të dytë, dërgohen në spitale për trajtim derisa të plotësojnë përsëri kushtet e shërimit. Më pas, vëzhgohen për dy javë në izolim.
Por ata nuk llogariten si raste të reja, citohet Tu nga mediat kineze.
“Ata që ritestohen pozitiv tashmë janë raportuar si raste të konfirmuara në testin e tyre fillestar, kështu që ata nuk do të llogariten vazhdimisht si raste të reja,” tha ai.
Kryeministri Li Keqiang deklaroi në një takim të forcave të punës në Pekin të hënën se “transmetimi lokal [i sëmundjes] në të gjithë vendin është ndërprerë në thelb, por rreziqet e rasteve të izoluara ose shpërthimit të lokalizuar ende ekzistojnë”.
Ndërsa nuk ka një numër në rang kombëtar për ata që ritestohen pozitivisht, autoritetet shëndetësore në provincën Guangdong, në jug të vendit, thanë në fund të muajit të kaluar se rreth 14 përqind e pacientëve – më shumë se njëqind në atë kohë – të cilët u shëruan nga koronavirusi, u testuan pozitiv përsëri.
Wang Xinhua, kreu i Universitetit Mjekësor Guangzhou,tha se është e mundshme që pacientët të riinfektohen. “Nuk është e qartë nëse ata kanë fituar një imunitet të fortë pas shërimit. [Reinfektimi] nuk është një mundësi e lartë por është akoma i mundur”, deklaroi.
Peng Zhiyong, drejtor i kujdesit intensiv në Spitalin Zhongnan të Universitetit Wuhan, tha që vetëm 1 përqind e pacientëve klasifikoheshin në këtë kategori.
Përveç Hubei dhe Guangdong, raste të ngjashme janë raportuar në Sichuan, Hunan, Tianjin dhe Shaanxi. Sidoqoftë, ende nuk ka udhëzime kombëtare për përcaktimin e këtyre pacientëve.
Raste pozitive në mesin e pacientëve të shëruar janë raportuar po ashtu në Japoni dhe Korenë e Jugut.
Yang Nian, një mjek në Wuhan, tha se ai mendonte se rezultatet negative përpara se pacienti të dilte sërish pozitiv, mund të ishin “negativë të rremë” që nuk arrijnë të zbulojnë sasitë e vogla të virusit akoma brenda pacientit.
Sipas udhëzimeve për Covid-19, pacientët kualifikohen si të rikuperuar dhe mund të dalin nga spitali kur testohen negativisht dy herë radhazi.
BoldNews
