Në media e në rrjetet sociale janë shfaqur ankesa të qytetarëve të cilët dhe pse shprehen se janë kontakte të personave që rezultuan pozitiv me COVID-19, tregojnë se nga autoritet nuk procedohet me testimin, por këshillohet vetëm karantinimi. Lidhur me testimet foli dhe Presidenti Ilir Meta në një emision televiziv mbrëmjen e sotme, duke rekomanduar teste për të gjithë kontaktet e të prekurve dhe atyre që shfaqin simptoma të virusit të ri.
“Të bëjmë sa më shumë testime për personat që kanë simptoma. S’kemi asgjë arsye që të jemi të kursyer për personat e kontaktit apo ata që kanë simptoma. Të rrisin nivelin e gjurmueshmërisë për të zbuluar kontaktet e personave që rezultojnë pozitiv me koronavirus”, tha Meta.
Kreu i Shtetit bëri me dije që masat nuk duhet të mungojnë për personelin e shëndetësisë, policinë dhe ushtrinë, që po kontribuojnë në betejën me armikun e padukshëm.
Lidhur me masat e marra me qëllim mospërhapjen e koronavirusit, Meta tha se “masat mund të jenë dhe më drastike në kuptimin e kufizimeve”.
“Qytetarët s’duhet të ankohen për masat se po merren për të mirën e tyre, merren dhe në vende të tjera të botës dhe për një arsye madhore. Masat të jenë sa më efikase në mënyrë që efektet e izolimit të jenë maksimale”, u shpreh. #Boldnews
Lexo edhe:
Koronavirusi. Meta: Brenda 2 ditëve mbledh Këshillin e Sigurisë, ftesë Ramës e Bashës
