“Vetëm duke bllokuar rrugët tona, bllokojmë dhe rrugën e virusit”, deklaroi sot ministri i Brendshëm, Sandër Lleshaj, ndërsa shprehu vendosmërinë e Policisë për të qenë rigoroze në zbatimin e kërkesave të autoriteteve të shëndetësisë.
Lleshaj inspektoi sot në terren forcat e Policisë, për të parë nga afër zbatimin e masave të kufizimit të qarkullimit të njerëzve dhe mjeteve.
Ai informoi qytetarët se “koha ndërmjet 05:00 dhe 13:00 është parashikuar vetëm për nevoja të domosdoshme jetike”.
“Rrugët e Tiranës dhe të mbarë vendit kanë sot një pamje sureale. Ato janë shkretuar krejtësisht nga çdo lëvizje mjetesh apo njerëzish. Një pamje që askush nuk e ka imagjinuar ndonjëherë dhe që askush nuk do ta dëshironte. Fatkeqësisht kjo nuk është pamja që duam, por ajo që absolutisht duhet”, tha ai.
Lleshaj vlerësoi se “për këtë po angazhohen masivisht qytetarët, që po zbatojnë me përgjegjshmëri masat e karantinës”.
“Punonjësit e Policisë së Shtetit po punojnë me regjim 12 orë pune. Gjatë kësaj periudhe nuk do të lejohen dalje për shëtitje, xhiro, grumbullime e të tjera të dëmshme për këtë situatë”, tha Lleshaj.
