Kreu demokrat Lulzim Basha i është drejtuar me një letër Organizatës Botërore të Shëndetësisë, ku krahas falenderimeve për mbështetjen, i kërkon që në situatën e pandemisë botërore të Covid 19 të ndihmojnë Shqipërinë me teste dhe pajisje mbrojtëse për personelin mjekësor, dhe të tjera pajisje të tjera të domosdoshme.
Basha shprehet se ndërkohë që shtohet rastet me shenjat e Covid 19, ka një rënie në bërjen e testeve, për shkak se ata mungojnë.
Gjithashtu, kreu demokrat ngre shqetësimin se ka mungesë të pajisjeve mjekësore, përfshi edhe ato të mbrojtjes së personelit mjekësor që ndodhet në vijën e parë të përballjes me koronavirusin.
“Duke qenë të ndërgjegjshëm për mundësitë e pakta që kanë autoritetet tona për ta përballuar të vetëm këtë situatë, si dhe duke shfrytëzuar këtë mundësi komunikimi, dëshiroj t’Ju kërkoj që të ndihmoni autoritetet shqiptare dhe Shqipërinë me sa mundeni, për marrjen e sa më shumë pajisjeve testuese, të kiteve testuese dhe të tjerave materiale testuese.
Vetëm duke shtuar numrin e testimeve dhe duke verifikuar në kohë çdo person të dyshuar si të prekur nga virusi, ne arrijmë të izolojmë personin në kohë dhe të frenojmë përhapjen e virusit në numër më të lartë qytetarësh.
Do të ishim shumë mirënjohës, nëse do të ndihmonit në sigurimin e një sasie të konsiderueshme vjeshjesh dhe pajisjeve mbrojtëse të tjera të domosdoshme për të mbrojtur stafet tona mjekësore”, shkruan Basha.
Deri më tani, Covid 19 ka shkaktuar dy viktima në Shqipëri, ndërsa ka infektuar 65 persona.
