Nga Boldnews.al
Shefi i Qarkullimit Rrugor të Tiranës, Erion Ahmetaj, është pezulluar nga detyra, pasi dyshohet për shkelje gjatë ditëve të fundit, kur Shqipëria është shndërruar në një “karantinë” të madhe.
Burime të “Boldnews.al” deklarojnë se Ahmetajt i është komunikuar urdhëri i pezullimit nga titullarët e Rendit dhe Sigurisë në Drejtorinë e Përgjithshme të Policisë, pas një kërkese të kryeministrit Edi Rama.
Në vend të Erion Ahmetaj është komanduar Taulant Gjoka, i cili ka mbajtur deri më tani detyrën e Komandantit të Trafikut të Tiranës.
Gjithashtu, mësohet se është larguar nga detyra edhe Shefi i Policisë Rrugore të Durrësit, Pal Marku.
Oficeri Marku më parë ka qenë Shefi i Komisariatit nr.6 në Tiranë, me urdhër të të cilit u arrestuan një numër i konsiderueshëm qytetarësh, që protestonin në Unazën e Re kundër projektit për prishjen e banesave të tyre.
Pse u largua Ahmetaj?
Burime konfidenciale deklarojnë për “Boldnews.al” se shkak për pezullimin e kryepolicit rrugor të Tiranës, Erion Ahmetaj, mendohet të jenë të paktën dy situata problematike- qarkullimi i betoniereve gjatë periudhës së “ndalim-qarkullimit” për shkak të pandemisë së korona-virusit; si edhe disa të dhëna, të cilat janë gjithësesi në verifikim, në të cilat mendohet se janë pajisur me leje të posaçme qarkullimi disa persona me precedentë penalë.
“Betonieret”
“Boldnews.al” ka mësuar nga burime të besueshme se kryeministri Rama nuk ka toleruar faktin që automjete betoniere të kompanive private qarkullonin në rrugët e Tiranës, ndërkohë që Qeveria kishte vendosur ndalimin e qarkullimit për të gjithë automjetet private.
Në bazë të një Akti Normativ, në vijim të masave për parandalimin e korona-virusit, Qeveria kufizoi në maksimum qarkullimin e mjeteve, fillimisht në Tiranë e Durrës, e më tej në të gjithë territorin e vendit.
Por, siç është konstatuar nga shumë qytetarë, mjetet e tonazhit të rëndë të kompanive private që operojnë në Tiranë, kanë qarkulluar lirshëm në rrugët e kryeqytetit.
Betonieret e disa prej kompanive të ndërtimit dyshohet se janë pajisur me Autorizim nga ana e Drejtorit të pezulluar tashmë të Policisë Rrugore të Tiranës, Erion Ahmetajt. Kjo dyshohet se është shkaku i parë për pezullimin e tij nga detyra.
Autorizim për personat me precedentë?
Të dhëna, të cilat gjithësesi kanë nevojë për verifikim, flasin se disa persona me precedentë penalë janë pajisur me autorizim të veçantë për lëvizje gjatë periudhës së “ndalim-qarkullimit”, të imponuar nga situata me Cov-19.
Sipas burime konfidenciale, disa persona me precedentë penalë janë konstatuar nga Policia në Fushë-Krujë, të pajisur me autorizimin për lëvizjen me automjet. Pikërisht, për këtë situatë mendohet se është nën verifikim edhe roli i kryepolicit të pezulluar të Tiranës, Erion Ahmetaj.
Erion Ahmetaj u emërua në krye të Policisë së kryeqytetit në Maj 2017. Gjatë periudhës që ai ka ushtruar detyrën në Tiranë, rrugët e qytetit kanë parë një mbipopullim të qarkullimit të betoniereve dhe mjeteve të tjera të rënda, në të gjithë oraret e ditës, duke rënduar ndjeshëm qarkullimin.
