Katër prokurorë të rinj vijojnë garën për të qenë pjesë e Prokurorisë së Posaçme kundër Korrupsionit dhe Krimit të Organizuar: 2 prokurorët e komanduar Vladimir Mara dhe Dritan Prençi, Doriana Bejko dhe Sotir Kllapi.
Vendimi është marrë në mbledhjen e kësaj të mërkure të Këshillit të Lartë të Prokurorisë.
Katër kandidatët do të garojnë për dy vendet vakante në SPAK.
SPAK aktualisht funksionon me 8 prokurorë me mandat 9-vjeçar dhe dy prokurorë të komanduar, Vladimir Mara e Dritan Prençi. Paketa ligjore e Reformës në Drejtësi parashikonte që SPAK të kishte 15 prokurorë dhe numri minimal i nisjes së aktivitetit ishte 10.
Në mbledhjen e sotme, Këshilli i Lartë i Prokurorisë ka caktuar përkohësisht dy prokurorë pranë Gjykatës së Shkallës së Parë në Tiranë. Bëhet fjalë për Anton Martinin dhe Donika Prelën, ish drejtuesja e Prokurorisë së Krimeve të Rënda.
Po ashtu, KLP ka caktuar dy drejtues në rrethe. Rifat Kojaku, caktohet përkohësisht drejtuesi i përkohshëm i Prokurorisë pranë gjykatës së shkallës së parë Dibër. Ndërsa Abaz Muca caktohet drejtuesi i përkohshëm i Prokurorisë pranë Gjykatës së Shkallës së parë Mat.
