Një qytetar nga Dibra, i cili ka thyer vetë karantinimin, për shkak se kishte ardhur në Shqipëri nga zonat e prekura nga koronavirusi, është gjobitur me 700 mijë lekë.
Policia e Dibrës njoftoi se masa administrative në vlerën 700.000 lekë, u vendos për shtetasin E. S., 29 vjeç..
“Ky shtetas, më datë 03.03.2020 është kthyer nga Italia dhe është njoftuar nga specialisti i Policisë së zonës për vetëkarantinim 14-ditor, për shkak se vinte nga një zonë e prekur nga virusi COVID-19, gjë të cilën nuk e ka respektuar.
Gjatë kontrolleve që ka bërë, Policia ka konstatuar se ky shtetas ka frekuentuar ambiente të jashtme në fshatin e tij.
Në zbatim të Aktit Normativ Nr. 3, datë 15.03.2020 ”Për marrjen e masave të veçanta administrative gjatë kohëzgjatjes së periudhës së infeksionit të shkaktuar nga virusi COVID-19″, Policia e ka ndëshkuar këtë shtetas, me masën administrative në vlerën 700.000 lekë”, thuhet në njoftimin e policisë.
