Doktori i njohur Tritan Kalo ka publikuar disa foto nga stafi i spitalit Infektiv në Tiranë, i kthyer tashmënë funksion për të kuruar pacientët me koronavirusin Covid 19, ndërsa i është drejtuar me një tjetër apel qytetarëve.
“Jemi këtu në krye të detyrës së bashku me Prof. N.Çomon, Dr. N. Kryemadhin, Dr. M. Qaton, Dr. Dr.A. Domin, Dr. A. Hoxhën si dhe një grup dijeplotë e vullnetplotë infermierësh, të mbështetur nga sanitaret, koordinatoret, etj”, shkruan Kalo në rrjetet sociale.
Në vijim, ai kërkon nga qytetarët që t´i binden rregullave, ndërsa garanton se pacientët shqiptarë po kurohen me të njëjtat medikamente si në vendet më të zhvilluara.
“”Bashkëqytetarë, ju duhet të bindeni se ato çka lexoni në shtypin botëror në lidhje me mundësitë më të fundmit terapeutike të mjekimit, të të gjitha formave klinike të COVID-19 edhe ne po ua ofrojmë të sëmurëve tanë, për të bërë të mundur shpëtimin e jetëve të tyre.
Nuk na mungojnë mjetet për t’u shërbyer, por mbi të gjitha ju sigurojmë se nuk na mungon humanizmi, dija e vullneti ynë për të bërë gjithçka të mundshme në luftën për jetën e të sëmurëve tanë.
Ju duam shumë na mirëkuptoni dhe na mirëbesoni. Njëkohësisht ajo çka na frymëzon është edhe fakti se, solidariteti dhe mbështetja e kolegëve mjekë e infermierë nuk na mungon. Bashkërisht ne do t’ia dalim mbanë!”
