Kryeministri Edi Rama u shfaq sot me një tjetër mesazh drejtuar shqiptarëve, ndërsa paralajmëroi se masat e parashikuara në Aktin Normativ të Qeverisë që u aplikuan në Tiranë dhe Durrës do të shtrihen në të gjithë vendin.
Rama tha se prej të martës do të blindohet kufiri i Shqipërisë, ndërsa shtoi se në dy javët e ardhshme do të ketë një rritje të kurbës së rasteve me koronavirus.
Kreu i Qeverisë gjithashtu shprehu falenderime për mbi 1 mijë mjekë dhe infermierë që iu përgjigjën pozitivisht thirrjes së ministres së Shëndetësisë për t´iu bashkuar ekipeve të bluzave të bardha.
Rama tha se bonusi për mjekët dhe infermierët që do jenë në vijën e parë të luftës ndaj koronavirus do të jetë 1 mijë euro, që nis që me rrogën e muajit mars dhe vijon përsa muaj do të vazhdojë kjo luftë.
Pjesë nga fjala e Ramës
“Nesër administrata është pushim, do ishte sido qoftë pushim meqë Dita e Verës ishte të shtunën. Do të vazhdojë edhe për ata që nuk janëpjesë e detyrave esenciale. Të tjerët do të jenë në punë siç do të jenë në punë edhe kompanitë jetike për kompanitë prodhuese.
Lajmi i mirë është se deri tani i janë përgjigjur thirrjes 467 mjekë. E përsëris që të gjithë mjekët dhe infermierët që paga e marsit do të jetë me një bonus prej 1 mijë eurosh. Ky bonus do t’u jepet edhe gjithë vullnetarëve që do të thirren në front. Është më e pakta që mund të bëjmë.
Java që vjen dhe tjetra pas saj do të vijë me numra të rritur. Dikush i quante dy javët e ngritjes së furtunës prandaj duhet të jemi të përgatitur për rastet që priten të shtohen pa asnjë dyshim.
Nuk më lejohet të mos ju them të vërtetën, aq më tepër kur lidhet me ju dhe familjet tuaja. Duhet ta dimë të vërtetën, ta pranojmë siç është dhe të jetojmë me të.
Sot hyn në fuqi akti normativ me forcën e ligjit që përcakton masat speciale, duke përcaktuar detyrime ligjore që ndihmojnë popullin. Reagimi juaj ka qenë fantastik deri më tani. Në këtë rast, jemi shumë larg gjysmës dhe prandaj çdo ditë duhet ta përjetojmë si një fillim të ri. Qeveria po punon me të gjitha forcat që të përgatistim çdo skenar. U kërkoj ndjesë të gjithë atyre që mund të kenë vështirësi të paparashikuara dhe ju lutem të na e bëjnë hallall që nuk i parashikojmë dot”.
