Nga BoldNews.al
Autoriteti i Komunikimeve Elektronike dhe Postare (AKEP) po aplikon “huqet” e Edi Ramës, duke vendosur “diktatin” e saj për shpërndarjen jo-ligjore të një audiomesazhi të kryeministrit tek klientët e kompanive celulare, i cili shfaqe para se këta të fundit të kryejnë telefonata.
Prej shumë orësh, mijëra përdorues të telefonisë së lëvizshme përballen me një audio-mesazh sensibilizues nga kryeministri Rama për “larjen e duarve” në situatën e epidemisë së korona-virusit.
Por, ky material audio, në përmbajtje të tij, ka edhe një shantazh zanor të kryeministrit Rama ndaj gazetarëve, ku i bën thirrje qytetarëve që “të mos dëgjojnë mediat”.
Mesazhi zanor shfaqet në telefonat e një numri të konsiderueshëm të abonentëve të të treja kompanive celulare që operojnë në Shqipëri.
Në një material audio, i cili shoqëron këtë shkrim, një operatore e kompanisë “Albtelekom/Eagle Mobile” i konfirmon një abonenti të shqetësuar nga mesazhi audio i Edi Ramës, se ai material është vendosur me urdhër të Autoritetit të Komunikimeve Elektronike dhe Postare (AKEP)
Po ashtu, nga verifikimet e kryera nga “Boldnews.al”, edhe kompanitë e tjera celulare rezultojnë të jenë “urdhëruar” nga AKEP-i për të shpërndarë mesazhin propagandues të Edi Ramës, nëpërmjet materialit zanor që u paraprin telefonatave që kryejnë qytetarët.
Operatorët e kompanive celulare, të cilët së fundit po përballen me ankesa gjithnjë e në rritje të qytetarëve për të eleminuar zërin e Edi Ramës nga telefonat e tyre, justifikohen me faktin që nuk mund të ndryshojnë asgjë, pasi është “me urdhër të AKEP-it”.
As AKEP-i dhe as kompanitë celulare nuk kanë shpërndarë asnjë njoftim të posaçëm për këtë situatë, e cila përbën jo vetëm ndërhyrje të pavend të kryeministrit në jetën private të qytetarëve, por edhe një shkelje ligjore nga AKEP-i apo kompanitë e telefonisë së lëvizshme.
Ligji “Për Komunikimet Elektronike” parashikon detyrimin e kompanive celulare që të krijojnë mundësitë për të vënë asetet e tyre në dispozicion të autoriteteve shtetërore në raste të emergjencave dhe gjendjes së luftës, me qëllim paralajmërimin për marrjen e masave parandaluese.
Kryeministri Edi Rama, nëpërmjet AKEP-it, ka shfrytëzuar këtë hapësirë ligjore, për ta përdorur për qëllime të pastra propagandistike dhe kundër medias, e cila, së bashku me shërbimin shëndetësor, gjendet në vijën e parë të frontit për të shpërndarë informacione utilitare për qytetarët në situatën e vështirë të pandemisë së shkaktuar nga korona-virusi.
Mesazhi zanor i kryeministri Rama, i cili iu shfaqet në telefonat një numri të madh qytetarësh, përcjell paralajmërime “të thjeshta”, që lidhen me larjen e duarve dhe me sugjerimin për të telefonuar numrin 127 për urgjencat mjekësore.
Por, përtej këtyre mesazheve të dobishme, të cilat gjithësesi shpërndahen në çdo kohë nëpërmjet mjeteve të informimit publik, kryeministri Rama ka zgjedhur që të shigjetojë median në materialin audio.
Kjo sjellje negative ndaj medias, tërësisht e pavend në situatën aktuale, por aspak e re në qasjen e kryeministrit Rama sa herë që është në vështirësi, ka shkaktuar efektin e kundërt.
Dhjetra qytetarë i janë drejtuar kompanive celulare për të gjetur mekanizmin që të eleminohet nga telefonat e tyre zëri i Edi Ramës.
Nga ana tjetër, punonjësit operatorë të telefonisë së lëvizshme justifikohen vetëm me faktin që “janë urdhëruar nga AKEP” për t’i bashkëngjitur thirrjeve telefonike edhe zërin e Edi Ramës.
Kjo situatë është një shkelje flagrante e ligjit, e hapësirës private të qytetarëve që mbrohet nga Kushtetuta dhe dëshmi e qartë se biznesi në Shqipëri, përfshirë edhe atë të konsideruar “të madh”, është nën diktaktin e një njeriu të vetëm.
Edi Rama ka vendosur t’u hyjë çdo shqiptari në shtëpi, duke shfrytëzuar në mënyrë abuzive strukturat shtetërore, të emërtuara të pavarura, si në rastin e AKEP-it, i drejtuar prej pak muajsh nga një ish-vartës i tij në kryeministri.
