Kryeministri Edi Rama ka zgjedhur një thënie të ish-Presidentit amerikan, Barack Obama, për masat e ndërmarra nga Qeveria për parandalimin e përhapjes së Covid 19.
Duket se mesazhi i Ramës i drejtohet shqiptarëve që kanë humbur durimin apo nuk kanë mirëpritur masat ekstreme, që nisën me mbylljen e shkollave dhe kopshteve, dhe vijuan me mbylljen e pub-eve, lokaleve, restoranteve, ndalimin e transportit publik, dhe deri qarkullimin e automjeteve.
Duke cituar një thënie të ish-Presidentit amerikan, për raste të tilla, Rama shpreh besim “se plani i përshkallëzimit që po ndjekim do të na japë rezultat, nëse të gjithë do të japin dorën e tyre dhe me ndihmën e Zotit, nuk do të humbasim vendosmërinë e durimin.”
“Nëqoftëse ju pyesni veten a mos është i ekzagjeruar reagimi për të anuluar grumbullime të mëdha apo aktivitete publike (dhe unë e dashuroj basketbollin), ja ku e keni një skicë të dobishme, se si masa të tilla mund ta ngadalësojnë përhapjen e virusit dhe të shpëtojnë jetë. Ne duhet të kujdesemi për njëri-tjetrin”/ Barak Obama”, ka postuar Rama në rrjet.
