Përhapja e coronavirusit është tema më e nxehtë në të gjithë botën, teksa në rang global janë prekur mbi 138,937 mijë persona, ndërsa janë regjistruar rreth 5,111 vdekje.
Me eventet kryesore sportive të cilat janë pezulluara në përpjekje për të parandaluar përhapjen e mëtejshme të virusit, pikëpyetje janë ngritur rreth mundësisë së anulimit të krejt sezonit të Premier Ligës.
Kështu potencialisht mund të rrezikohet dhe titulli kampion për Liverpool-in, megjithatë duhet thënë se shpallja e tyre si kampionë është thjesht çështje zyrtarizimi duke marrë parasysh diferencën e madhe me ndjekësit.
Raportime nga “Telegraph” zbulojnë se “nuk ka garanci” që Liverpooli do të shpallet kampion i Premier Ligës, nëse sezoni aktual ndërpritet përfundimisht.
Sipas mediave angleze, Premier Liga do të mbajë një mbledhje ku do të diskutohet se si do të veprohet nëse detyrohen të anulojnë përfundimisht sezonin. Në fakt nëse dicka e tillë ndodh rregullorja e Premier Ligës nuk parashikon asnjë veprim të mëtejshëm.
Kështu tani shpresohet vetëm që situata e coronavirusit të përmirësohet, pasi në të kundërtën vendime të paprecedenta janë të detyrueshme të merren.
