Mbrëmjen e nesërme është e programuar të luhet ndeshja mes Getafes dhe Interit, e vlefshme për raundin e 1/16-ve të Europa League. Momentalisht nuk është marrë asnjë vendim për të anuluar këtë ndeshje.
Por në lidhje me zhvillimin e ndeshjes, Presidenti i Getafe, Angel Torres Sanchez, njoftoi vendimin për të mos u nisur drejt Milanos, në mënyrë që të mos rrezikojë shëndetin e sportistëve dhe anëtarëve të stafit teknik.
“Ne kemi kërkuar nga UEFA një alternativë. Nuk duam të bashkohemi me shpërthimin e “Coronavirus”. Kemi kërkuar nga federata ndihmë për këtë problem. Nëse duhet të humbasim në tavolinë, le të humbasim. Nuk dua të marr përsipër asnjë lloj rreziku”.
Vetë pronari i klubit iberik kishte treguar njëfarë pesimizmi në konferencën për shtyp, të mbajtur disa orë më parë: “Qeveria spanjolle ka qenë e qartë, ne do të shohim se çfarë do të vendosë shteti italian. Ose fluturojmë të sigurt, ose e pezullojmë udhëtimin. Unë nuk jam mjek, nuk mund të them asgjë, derisa të ketë diçka përfundimtare. Çdo ditë është më e ndërlikuar, do të shohim se çfarë na këshillojnë specialistët. UEFA nuk ka thënë asgjë për momentin, jemi në kontakt të drejtpërdrejtë me të. Në orët e ardhshme do të vendosim”.
