Për shkak të anulimit të çdo ndeshjeje deri më 3 prill për shkak të coronavirusit, Seria A mund të mos e mbyllë në kohën e duhur kampionatin. Në një situatë tjetër kjo nuk do të ishte problem pasi kampionati mund të shtyhej përtej afatit të përcaktuar, por duke qenë se jemi në prag të Euro 2020, kompeticion i cili starton më 12 qershor, situata bëhet e ndërlikuar.
Sipas medieve italiane, presidenti i futbollit Italian, Gabriele Gravine, ka tre alternativa, për përcaktimin e kampionit pa i luajtur të gjitha ndeshjet e mbetura. Opsioni më i mundshëm për të mbyllur sezonin, është një fazë Play Off me 4 skuadrat e para të renditjes, për të përcaktuar fituesin e kampionatit.
Sipas formulës vendi i parë përballet me vendin e katërt dhe vendi i dytë me të tretin.
Bazuar në renditjen aktuale mund të kemi sfidat Juventus-Atalanta dhe Lazio-Inter, të cilat mund të luajnë edhe me sistemin vajtje-ardhje, për të përcaktuar më pas dy skuadrat finalist që do të diskutojnë titullin kampion.
I njëjti rregull pritet të ndiqet edhe për rënien nga kategoria, ku do të garojnë Genoa, Lecce, Spal dhe Brescia, ndërsa vetëm fituesja do të mund t’i shpëtojë rënies në Serinë B dhe tre të tjerat do t’i japin lamtumirën ligës së më të fortëve.
Nëse vendoset për këtë version, atëherë Seria A do të mund t’i japë verdiktet shumë shpejt dhe do të ketë kohë si për angazhimet europiane, ashtu edhe për mbylljen e Kupës së Italisë, ndërsa edhe Roberto Mancini “fërkon duart” pasi mund të ketë gati lojtarët që do grumbullojë për Europianin, të paktën një javë më herët nga 31 maji.
