Xhandarmëria e Oise në Francë njoftoi se një person u arrestua të martën për vendosjen në shitje në internet, të materialeve të skaduara mbrojtëse kundër koronavirusit, si maska dhe xhel.
Operacioni i drejtuar nga xhandarët e Oise, ku është shënuar numri më i madh i rasteve të kontaminimit të koronavirusit, zbuloi 9,400 maska, 3.300 doreza, 80 shishe me 150 ml xhel hidroalkoolik dhe 14 shishe me 500 ml xhel hidroalkoolik, të skaduara, të shitura në faqen, Le Bon Coin. Lajmi është raportuar në media, dhe në gazetën Le Figaro.
Mashtrimi u zbulua pas një vëzhgimi në faqet e shitjeve në internet nga xhandarët e zyrës së inteligjencës së grupit të xhandarmërisë në Somme. Personi 59-vjeçar u arrestua dhe u vendos në arrest policie me udhëzimin e prokurorisë Beauvais.
Edhe në Tiranë, ka patur dje dhe sot një debat të fortë lidhur me maskat e skaduara që u janë shpërndarë personelit shëndetësor. Opozita e zbuloi dhe denoncoi faktin se maskat e kishin kaluar afatin që prej vitit 2011. Qeveria u shpreh se ato janë sërish të vlefshme, dhe akuzoi opozitën për përdorim politik të krizës së koronavirusit. Ndërkohë, një mjek i njohur, Gezim Xhepa, është shprehur i revoltuar, dhe e ka quajtur kriminale dhe e rrezikshme, përdorimin e maskave të skaduara që kanë qendruar 9 vite në magazinë.
