Mbrëmjen e sotme, liga e Kampioneve, premton një spektakël të vërtetë, ku të gjitha skuadrat do të japin maksimumin e mundshëm për të siguruar një vend për në çerekfinalet e këtij kompeticioni magjik.
Kampionët në fuqi të Europës, Liverpool-i, ka një detyrë të vështirë pasi duhet të përmbysë një gol disavantazh dhe përballë do të ketë një skuadër të fortë siç është Atletico e Madridit dhe për më tepër që drejtohet nga ana e Diego Simeones, një mjeshtër i arritjes së rezultatit.
Ndeshja e parë në Spanjë u mbyll me rezultatin 1-0 në favor të vendasve, ku sfidën e vendosi Saul në minutën e katërt. Por siç pati premtuar edhe Jurgen Klopp pas disfatës, atmosfera në “Anfield” do të ishte e papërballueshme për miqtë, duke garantuar kështu spektaklin.
Mungesë e rëndësishme për “The Reds” do të jetë portieri Allison, ndërsa mungon edhe Shaqiri dhe Clyne. Nga ana tjetër, Simeone, do të ketë të gatshëm të gjithë titullarët.
Përballje mes gjigandësh do të jetë edhe ajo mes PSG-së dhe Borussia Dortmundit, që luhet në ‘Parkun e Princave’. Nga ndeshja e parë në ‘Signal Iduna Park’, Dortmund fitoi me rezultatin 2-1.
Për PSG-në ky do të jetë një test i vërtetë dhe një dështim i radhës në Ligën e Kampioneve në këtë fazë të kompeticionit do të ishte me shumë pasoja për klubin francez. Nga ana e tjetër verdhezinjtë e Dortmundit, luajnë pa presion dhe janë të gatshëm të bëjnë surprizën të udhëhequr nga Haaland, autori i të dy golave në sfidën e parë.
PSG vjen me problem për sa i përket formacionit, pasi të sigurta janë mungesat e Verratit, Herrera-s si dhe Meunier, ndërsa në dyshim për shkak të një gjendjeje gripale është Kylian Mbappe i cili nuk është stërvitur 2 ditët e fundit. Mungesa e vetme për Dortmundin do të jetë Marco Reus, i dëmtuar.
Ndeshjet luhen mbrëmjen e sotme, ora 21:00.
