“Ishte një moment dëshpërimi, turni po mbaronte dhe ndjehesha e pafuqishme. Para se të flija, kisha qarë shumë, pastaj u shemba. Nuk mendoja se fotoja ime do ngjallte kaq shumë interes”, thotë Elena Pagliarini.
Ajo është infermierja protagoniste e një fotoje që ka bërë xhiron e rrjetit jo vetëm në Itali, por në mbarë botën.
Fotoja e infermieres italiane është bërë në orën gjashtë të mëngjesit, pas një nate pune në dhomën e urgjencës në spitalin e Kremonës, një nga më të prekurit nga epidemia e koronavirusit.
“Isha në siklet kur e pashë veten në të gjithë gazetat,” thotë ajo për gazetën Corriere della Sera.
“Ndjehesha e turpëruar që po tregoja anën time më të brishtë. Nga ana tjetër jam e lumtur: në celular më vijnë mesazhe të bukura nga njerëz që e kanë identifikuar veten me historinë time”.
“Kam shumë pasion për punën që bëj. E bëj pa dashur të falënderohem. Në fakt nuk ndjehem e lodhur fizikisht, madje mund të punoja edhe 24 orë nëse është e nevojshme. Nuk e fsheh se jam në ankth sepse po luftojmë një armik që nuk e njohim. Mezi pres që gjithçka të marrë fund”.
Fotoja është bërë nga doktoresha Françesca Mangiatordi.
“Unë doja që kjo foto të bëhet një ftesë për të na ndihmuar: qëndroni në shtëpi, respektoni rregullat sepse kjo është mënyra e vetme për të qenë pranë nesh”, thotë doktoresha.
