Koronavirusi mund të qëndrojë në ajër për të paktën tridhjetë minuta dhe të mbulojë një distancë prej rreth 4.5 metrash në ambiente të mbyllura, siç është një autobus i vogël, shumë më tepër sesa siguria e një ose dy metrave të rekomanduara nga autoritetet shëndetësore në pjesë të ndryshme të botës. Rezultati është i një studimi të epidemiologëve kinezë, i botuar nga revista shkencore “Practical Preventive Medicine dhe e cituar nga “South China Morning Post”. Sipas Studimit, koronavirusi, siç u zbulua në javët e fundit nga hulumtime të tjera, mund të mbetet në sipërfaqe për ditë, duke rritur rrezikun e kontraktimit të tij për ata që i prekin.
Duhet thënë se të dhënat që dalin kanë nevojë për studime të mëtejshme për t’u verifikuar, shkruan italiania “La Repubblica”, që ka raportuar për studimin. Studiuesit kinezë shprehen se qëndrueshmëria në sipërfaqe i nënshtrohet faktorëve të ndryshueshëm, siç është lloji i sipërfaqes dhe temperatura: në 37 gradë celsius, virusi mund të rezistojë deri në dy ose tre ditë, në qelq, metal, plastikë, letër dhe pëlhura, shpjegojnë epidemiologët nga Provinca Hunan pas hetimit të një grupi infeksionesh. Pastaj, sipas studimit, koronavirusi mund të mbijetojë më shumë se pesë ditë në jashtëqitje ose lëngjet e trupit.
Dhomat e mbyllura dhe të vogla janë rrezik infektimi. “Mund të konfirmohet se në një ambient të mbyllur me ajër të kondicionuar, distanca e transmetimit të koronavirusit të ri do të tejkalojë distancën e njohur zakonisht si të sigurt”, shkruajnë studiuesit të udhëhequr nga epidemiologu Hu Shixiong, në hulumtimin e botuar në revistën shkencore “Practical Preventive Medicine”, duke marrë si shembull një autobus.
Studimi ekzaminoi një grup rastesh që datojnë nga 22 janari, disa ditë para fillimit të vitit të ri hënor në Kinë dhe kur epidemia nuk njihej ende si një emergjencë kombëtare në shtetin Lindor. Një pasagjer që tashmë po përjetonte simptomat e sëmundjes, i identifikuar si “A”, hipi në një autobus me gjatësi me 48 vende, i ulur në rreshtin e parafundit, pa maskë për të mbuluar fytyrën. Sipas pamjeve të kamerave CCTV (të detyrueshme në Kinë), burri nuk ndërveproi me pasagjerë të tjerë gjatë gjithë udhëtimit, i cili zgjati katër orë. Koronavirusi, megjithatë, kishte kohë për të zbritur në shtatë pasagjerë të tjerë përpara se A të linte mjetin, sipas rezultateve të studiuesve, përfshirë disa që ishin gjashtë rreshta përpara “pacientit zero”, në një distancë të vlerësuar në rreth 4,5 metra.
Rreth gjysmë ore pas përfundimit të udhëtimit, një tjetër grup njerëzish hipën në autobus dhe njëri prej tyre që nuk mbante maskë u infektua, mendohet për shkak të grimcave të mbetura nga grupi i pasagjerëve të ulur më parë. Pacienti i marrë në konsideratë, megjithatë, hipi në një minibus tjetër, duke infektuar, brenda një ore, dy persona të tjerë, njëri prej të cilëve ishte në një distancë prej rreth 4.5 metra. Sipas studimit, më në fund u shfaq se askush nga personat që mbanin maskë në fytyrë ndërsa udhëtonin me pacientin zero, nuk kontraktuan koronavirusin.
Edhe pse ka akoma pyetje të hapura rreth studimit – siç është fakti se pse personi i ulur pranë A nuk është prekur me koronavirus, pavarësisht se ka ekspozimin më të lartë – përfundimi i studiuesve është që të mbani maskën kur të hipni mjetet publike dhe të “minimizoni kontaktin me duar dhe hapësirat publike, dhe shmangni prekjen e fytyrës tuaj me duar, para se t’i pastroni ato”.
/BOLDNEWS/
