Pas lirimit gjatë ditës së sotme nga Gjykata e Apelit në Tiranë, shtetasi turk Selami Simsek është dërguar në qendrën e pritjes së emigrantëve në Babrru.
Simsek qëndroi në qelitë e paraburgimit “Mine Peza” në Tiranë që prej muajit gusht të vitit të shkuar dhe pas dënimit me një vit burg nga Gjykata e Shkallës së Parë u lirua nga Gjykata e Apelit pasi ka kryer periudhën e dënimit për shkak të zgjatjes së afateve në qelitë e paraburgimit.
I dënua në fund të muajit janar me 12 muaj burg. Simsek ishte arrestuar bashkë me mësuesin tjetër turk, Harun Çelik, i cili u transferua me urgjencë drejt Turqisë më datë 1 janar të këtij viti pa e shqyrtuar kërkesën e tij për azil.
Ata akuzohen për dokumente të falsifikuara. Duke qenë se Turqia u ka hequr të drejtën për t’u pajisur me dokumente shtetërore turke, shpesh mbështetësit e Lëvizjes Gylen pajisjen me pasaporte false për t’u larguar nga vendi dhe për pasojë për t’i shpëtuar burgosjes.
Ata akuzohen si bashkëpunëtorë për grushtin e dështuar të shtetit ndaj Erdogan në korrik të vitit 2016.
Kërkesa për azil është depozituar më 10 janar me pretendimin se në Turqi i rrezikohet jeta. Ende nuk ka një vendim përfundimtar nga autoritetet shqiptare nëse kërkesa e tij do të pranohet. Avokati mbrojtës sqaron se brenda 30 ditëve qeveria duhet të shprehet në lidhje me azilkërkimin.
