Operacioni Forca e Ligjit (OFL) u ka dërguar formularët e vetëdeklarimit dy personave, banues në Berat, të dënuar për trafik të lëndëve narkotike.
Përmes një njoftimi zyrtar, OFL bëri të ditur në zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL vijon intensivisht punën për kryerjen e veprimeve komplekse, në bashkëpunim me strukturat e tjera të Policisë së Shtetit.
Në kuadër të Aktit Normativ nr. 1, datë 31.01.2020, OFL u ka dërguar kërkesat për vetëdeklarim të pasurisë, shtetasve:
Ervis Gavelli, banues në Berat, dënuar për veprën penale “Trafikim i lëndëve narkotike”.
Leonat Gavelli, banues në Berat, dënuar për veprën penale “Trafikim i lëndëve narkotike”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së, të cilat do t’i dërgohen SPAK-ut, për veprime të mëtejshme”, thuhet në njoftimin e OFL.
Mësohet se Ervisi dhe Leonati janë vëllezër. Nga raportimet mediatike mësohet se Leonat Gavelli, bashkë me dy kushërinj të tij, janë konsideruar nga autoritetet italiane si drejtues të rrjetit të trafikut që sillte kokainë nga Kolumbia për ta shitur në tregun e vendit fqinj, por edhe në Zvicër.
Sipas hetimeve të nisura në vitin 2007 nga policia italiane, për trafikantët shqiptarë punonin korrierë italianë dhe kolumbianë të cilët transportonin kokainën.
Leonati mësohet se vepronte në Kolumbi ku siguronte lëndën narkotike dhe ja dorëzonte më tej vëllait dhe kushëririt në Itali. Dy vëllezërit beratas janë dënuar nga gjykata italiane.
Leonat Gavelli u rrëmbye në 2015 te “Komuna e Parisit” në Tiranë, por më pas u la i lirë.
