Në kuadër të masave të marra në mbrojtje të Koronavirusit të parat ishin pikat kufitare kryesisht aeroportet.
Edhe në Shqipëri ndodhi e njëjta gjë. Por jo vetëm kaq, ajo që shihet në këtë prizëm është edhe një faktor tjetër ai i ndikimit të këtij fenomeni në ekonominë aeroportuale.
Kujtojmë këtu se vetëm pak ditë më parë dy kompani të mëdha ajrore anuluan fluturimet me Tiranën si pasojë e masave kundër koronavirusit.
Ky është vetëm një shembull i vogël për të treguar se çfarë po ndodh në botë dhe me ekonominë e këtij transporti.
Sot kompanitë ajrore botërore mund të regjistrojnë këtë vit deri në 113 miliardë dollarë humbje të të ardhurave për shkak të epidemisë së koronavirusit të ri, theksoi sot Shoqëria Ndërkombëtare e Transportit Ajror (IATA).
“Situata që rezulton nga COVID-19 është pothuajse e pazakontë”, nënvizoi drejtori i përgjithshëm i IATA-s, Alexandre de Juniac, në një komunikatë të publikuar në përfundim të një takimi në Singapor.
“Në më pak se dy muaj, perspektiva e këtij sektori në pjesën më të madhe të rajoneve të botës do të zbehet në mënyrë radikale”, theksoi ai.
IATA i vlerësoi humbjet e të ardhurave nga kompanitë ajrore për transportin e pasagjerëve në një interval që arrin deri në 63 miliardë dollarë, nëse përhapja e virusit ndalon dhe deri në 113 miliardë dollarë nëse koronavirusi vazhdon të përhapet.
Ky vlerësim nuk merr parasysh humbjet e transportit të mallrave.
Skenari më i keq është një ulje prej 19% e të ardhurave botërore nga transporti ajror i pasagjerëve.
“Nga pikëpamja financiare, kjo do të ishte ekuivalente me atë që ka pësuar sektori gjatë krizës së fundit financiare botërore”, theksoi organizata.
Më 20 shkurt, IATA publikoi vlerësimin e parë prej 29,3 miliardë dollarësh nga humbjet e të ardhurave në një skenar ku impakti ishte i limituar në tregjet e asociuara në Kinë. Por virusi ka prekur që prej asaj kohe më shumë se 80 vende.
Më shumë se 95 000 persona në botë janë prekur nga koronavirusi i ri dhe 3 200 kanë humbur jetën.
