Prej orëve të para të mëngjesit të sotëm, Inspektoriati Kombëtar i Mbrojtjes së Territorit ka zbarkuar në zonën e Astirit në kryeqytet për të rinisur shembjen e objekteve në kuadër të ndërtimit të “Unazës së Re”.
Sot është parashikuar që të prishen 20-30 objekte, të paralajmëruara nga IKMT.
Mësohet se ky aksion ishte parashikuar për në datën 17 shkurt, por që u anullua deri në ditën e sotme.
Ndërkohë disa banorë pretendojnë se ditën e djeshme nuk ishin lajmëruar për aksionin e ditës së sotme duke shkaktuar kaos dhe trafik në qarkullimin e automjeteve, vonesa të qytetarëve për në punë dhe probleme me qarkullimin e urbaneve.
Qytetarë janë parë të nervozuar me forcat e Policisë duke debatuar për bllokimin e autobusëve ndërsa shihet më pas që hyjnë nëpër rrugicapër të kaluar, pasi Policia nuk i lejon të kalojnë pranë fadromave.
FNSH dhe forcat ‘Shqiponja’ kanë zbarkuar te rrethrotullimi në hyrje të Tiranës i njohur si ‘Shqiponja’, ku po mbajnë në kontroll situatën.
Ndërkohë, qarkullimi i automjeteve është bllokuar dhe policia po devijon trafikun, duke mos lejuar banorët të kalojnë në zonën e shembjes.
Një nga banorët e kësaj zone ka shprehur revoltë në media për humbjen e biznesit, pronës, pavarësisht se për to ka paguar për t’i blerë dhe ka derdhur taksat.
“Kisha një biznes me 6 punëtorë në këtë zonë dhe punoja sipas ligjit, ndërsa tani jam në rrugë si barbon, pa pronë, pa shtëpi, pa asgjë. 100 vjet shtet dhe këtu nuk ka shtet!” tha banori.
