Një grup nxënësish të shkollës Janaq Kilica në qytetin e Fierit kanë mbushur spitalin e Fierit, për shkak të një helmimi.
Nga të dhënat e para mësohet se nxënësit kanë pasur probleme me frymëmarrjen, marrje mendsh, gjendje të fikti, shenja të ngjashme të një helmimi, por ende nuk dihet se me çfarë mund të jetë shkaktuar.
Një dyshim është që nxënësit po ndiqnin një eksperiment në laboratorët e shkollës, ndërsa një tjetër variant është që në mjediset e shkollës është hedhur një lëndë e cila ka shkaktuar helmimin masiv të nxënësve.
Pritet që analizat të përcaktojnë shkakun e helmimit, ndërsa policia ka nisur hetimet, por ende nuk ka një informacion zyrtar.
Të dhënat janë kontradiktore lidhur me shkakun e helmimit, ndërsa urgjencat vijojnë të transportojnë nxënës nga mjediset e shkollës drejt spitalit rajonal Fier.
Raportohet se në mjediset spitalore ndodhen rreth 20 nxënës, disa prej të cilëve me simptoma të lehta, ndërkohë që një pjesë tjetër ka pasur simptoma më të rënda.
Ky është incidenti i dytë brenda pak ditësh në shkollën Janaq Kilica, ku duket se përsëritet i njëjti fenomen. Pak ditë më parë u helmuan 7 nxënës.
