Tedi Blushi, Zëdhënësi i Presidentit, Ilir Meta, ka reaguar lidhur me praninë e ministres të Drejtësisë, Etilda Gjonaj, në konferencën e organizuar nga Prokuroria, duke theksuar se “të gjithë prisnin që Prokuroria të vepronte ndaj saj, por sot e shohin si pjesë të frontit të Ramaformës në konferencën e Prokurorisë duke qenë edhe krenare!”
Gjonaj tha se në lajmin pozitiv të Komisionit Europian për Shqipërinë, rol thelbësor ka reforma në drejtësi.
“Integrimi europian është një aspiratë e shqiptarëve, një ëndërr e papërmbushur. Është detyrë e gjithë institucioneve të drejtësisë. Është sfida jonë e përbashkët për të bashkërenduar veprimet tona, për të siguruar rezultate të prekshme. Reforma në drejtësi ka sjellë një kontribut në reformimin e drejtësisë penale. Ndryshimet ligjore i dhanë rol të ri prokurorisë duke garantuar pavarësi të plotë në hetim. Forcimi i pavarësisë duhet të shoqërohet edhe me konsolidimin e mekanizmave institucionalë që ndëshkojnë cdo lloj fryme të korrupsionit”, tha Gjonaj.
Pas deklaratës së saj, ka reaguar Blushi i cili paralajmëron se në manifestimin e ardhshëm do të mblidhen shumë më shumë se dje shqiptarë që nuk e pranojnë atë që ai e quan kryemaskaradë.
“Pandëshkueshmëria, Padrejtësia dhe Pafytyrësia kanë arritur majat! Herën tjetër do mblidhen shumë herë më shumë se dje, shqiptarë të ndershëm dhe me dinjitet, që s’mund të pranojnë këtë Kryemaskaradë!”, shkruan Tedi Blushi.
Reagimi i Tedi Blushit
Tallja me Reformën në Drejtësi dhe bërja e ligjeve puçiste anti-kushtetuese pati meritë të madhe për të mbledhur kaq shumë shqiptarë kundër grushtit të shtetit, ku Ministrja e Drejtësisë, siç është provuar nga shkresat zyrtare, akuzohet për 4 vepra penale.
Ndërsa të gjithë prisnin që Prokuroria të vepronte ndaj saj, sot e shohin si pjesë të frontit të Ramaformës në konferencën e Prokurorisë duke qenë edhe krenare! Pandëshkueshmëria, Padrejtësia dhe Pafytyrësia kanë arritur majat! Herën tjetër do mblidhen shumë herë më shumë se dje, shqiptarë të ndershëm dhe me dinjitet, që s’mund të pranojnë këtë Kryemaskaradë! TURP! SHAME ON YOU!
