Presidenti Ilir Meta ka njoftuar një protestë në mbrojtje të Kushtetutës në orën 17:00 të kësaj të hënë, në “Bulevardin Dëshmorët e Kombit”.
Bazuar në lejen e kërkuar në Polici, protesta pritet të zgjasë rreth dy orë. Organizatorët kanë ngritur një podium përballë Presidencës ku pritet të mbajë një fjalim kreu i shtetit, por edhe personazhe të njohura. Burimet kanë treguar se i pari që do të flasë në këtë tubim, do të jetë juristi shqiptar Ledi Bianku, personalitet i njohur i së drejtës ndërkombëtare dhe ish-anëtar i Komisionit të Venecias. Personalitete të tjera që pritet të flasin janë regjisori Robert Budina dhe karikaturisti Bujar Kapexhiu. Kreu i shtetit pritet të jetë i fundit ai që do të mbajë një fjalim në podiumin e krijuar rishtazi.
Burime pranë Presidencës bënë me dije se në fund të protestës, Meta pritet të firmojë “një dekret të jashtëzakonshëm”, pa dhënë detaje të tjera.
Lulzim Basha dhe Monika Kryemadhi, por dhe krerë të partive të tjera opozitare si dhe eksponentë të rëndësishëm të opozitës, kanë konfirmuar pjesëmarrjen në protestë si qytetarë. Personazhe publike po ashtu kanë deklaruar se do ti bashkohen protestës.
Policia ndërkohë ka marrë masa për mbarëvajtjen e protestës dhe rreth 1.000 efektivë pritet të jenë të angazhuar. Presidenti Ilir Meta nga ana tjetër ka bërë me dije se protesta do të jetë paqësore.
Kreu i shtetit akuzon mazhorancën se me procedura anti-ligjore e anti-kushtetuese po tenton të kapë Gjykatën Kushtetuese. Këtë ai e quan “një grusht shteti” nga ana e mazhorancës.
