Presidenti Ilir Meta, gjatë fjalës së tij nga podiumi i protestës te Bulevardi Dëshmorët e Kombit në kryeqytet, u shpreh se shteti është kthyer në instrument të oligarkëve dhe mazhorancës. Ndërsa për parlamentit, tha se është kthyer në “gjysmë-parlament” në shërbim të pushtetit.
Meta u shpreh se zëvendësimet e mandateve të deputetëve të opozitës u bënë në mënyrë anti-kushtetuese. Ai shtoi se ekzistenca e parlamentit nuk është kushtetuese, pasi nuk ka 140 deputetë.
“Ky nuk është shteti i së drejtës dhe qytetareve, por është instrument i pushtetit të oligarkëve. Gjysmë-parlamenti është shndërruar në një kukull të këtij pushteti puçist të pa fe dhe të pa familje”, tha Meta.
“Kujtohemi për shkencëtare vetëm kur bie tërmeti. Jemi një vend që kemi 0 investime në dije e progres. Kemi një shtet ku sulmohet fjala e lirë, ata bënë një ligj kundër Kushtetutës që të garantojnë ndëshkimin për ti mbyllur gojën gazetarëve dhe qytetareve. Ndaj dhe KE u trondit dhe e çoi në Komisionin e Venecias”, shtoi kreu i shtetit.
“Grushti i shtetit me shpopullimin e vendit. Ideatorët e tij janë dhe projektuesit e shpopullimit dhe shfarosjes së Shqipërisë që s’do ndodhë kurrë” vijoi ai.
Ai u ndal dhe te zgjedhjet e fundit parlamentare. Duke përmendur përgjimet e dosjes 184 dhe 339, theksoi se dosjet treguan vetëm majën e ajsbergut të vjedhjes së votave.
Ndërsa për zgjedhjet e stilit monist, përmendi deklaratën e Glover, shefen e misionit të OSBE/ODHIR, që vuri në dukje problematikat e shumta të procesit. “Dhe duke vajtur në zgjedhje mono-partiake çuan çuna problematikë”, shtoi ai.
