Një ditë para manifestimit të 2 marsit, Presidenti Ilir Meta, ka postuar në rrjetet sociale një video të 30 viteve më parë, që përkon me protestat e nisura në Qytetin Studenti dhe më pas që përfshinë kryeqytetin dhe qytetet kryesore në vend kundër diktaturës.
Presidenti ka zgjedhur të postojë momentin kur Arben Imami, një nga drejtuesit e lëvizjes studentore, në atë kohë pedagog te Universiteti i Arteve, thërriste emrat e studentëve dhe pedagogëve që do të shkonin në takimin me Ramiz Alinë, Presidentin komunist që njëkohësisht drejtonte edhe PPSH-në, e cila më pas u shndërrua në Parti Socialiste, ku militoi për vite me rradhë edhe Ilir Meta.
Kreu i Shtetit shkruan se “kurrë nuk e mendoja se pas 30 viteve do të vinte kjo ditë, që të ftoja më ✌mars të gjithë qytetarët e Shqipërisë, për të mbrojtur fitoren më të madhe të popullit tonë, pluralizmin politik, lirinë dhe demokracinë”.
“Vetëm paprekshmëria e Kushtetutës dhe ndëshkimi i merituar i puçistëve që e kanë dhunuar atë, do ta mbrojë popullin tonë nga instalimi i një regjimi tiranik njëpartiak dhe kleptokratik.
Po ndaj me ju disa emocione të miat kur një nga ish-drejtuesit kryesorë të Lëvizjes Studentore, Arben Imami më thërriste mua dhe disa studentë të rinj për të shkuar në përballjen finale me kupolën e diktaturës, që u detyrua të pranonte kapitullimin e regjimit më të pashembullt shtypës dhe izolues në kontinent.
Le ta dëgjojë nesër e gjithë bota demokratike thirrjen e popullit shqiptar: E DUAM SHQIPËRINË SI GJITHË EUROPA!”, shkruan Meta.
