Vëmendja e të gjithë botës sportive sonte në mbrëmje, do të jetë në “Santiago Bernabeu”, pasi Reali i Madridit pret rivalët e përjetshëm të Barcelonës.
El Classico e mbrëmjes së sotme merr një kuptim tjetër, pasi është një ndeshje vitale për shanset e titullit kampion për të dyja skuadrat. Reali i Madridit do të kërkojë fitoren pasi aktualisht gjendet 2 pikë prapa katalanasve dhe suksesi do t’i katapultonte ata përsëri në krye të La Ligës.
Ndërkohë nga ana tjetër, një fitore e Barcelonës do të ishte akoma më e rëndësishme, pasi do ta çonte diferencën në krye në 5 pikë, duke hedhur kështu një hap të sigurt drejt titullit kampion.
Vendasit do të kenë organikë të plotë për ndeshjen e sotme, me përjashtim të mungesës së bujshme të Eden Hazard, që u dëmtua në mesjavë përballë Manchester Cityt, ndërsa Barça vjen me telashet e zakonshme, që janë mungesat në repartin e avancuar.
Sfida ndërmjet skuadrave është e balancuar edhe sa u përket statistikave në ndeshjet e kampionatit, teksa klubet janë përballur 179 herë dhe numërojnë nga 72 fitore secila, ndërsa 35 ndeshje kanë përfunduar në barazim.
Në këtë derbi vëmendje merr edhe debutimi i Quique Setien në ‘Clasico’, i cili mori skuadrën në gjysmë-sezon, pas shkarkimit të Ernesto Valverdes. Gjithashtu për tu përmendur është fakti që Lionel Messi, do të bëhet lojtari me më së shumti paraqitje në një ‘Clasico’, duke kaluar rekordin e shokut të skuadrës, Xavi Hernandez.
Përballja mes dy gjigantëve të futbollit evropian luhet sonte në orën 21:00.
