Vangjush Dako është rizgjedhur anëtar i Asamblesë Kombëtare të PS-së. Gjithashtu si anëtar i Asamblesë Kombëtare është rizgjedhur edhe Qazim Sejdimi, i njohur si “Lala i Elbasanit”.
Pavarësisht se është përfshirë në listën e zezë të DASH dhe nuk u rikandidua për një tjetër mandat kryebashkiaku në votimet e 30 qershorit, duket se miqësia me Kryeministrin Edi Rama vlejnë shumë më tepër në rradhët e delegatëve të PS-së.
Para disa javësh, në një nga emisionet televizive, Rama tha se Dako do të mbetej mik i tij, pavarësisht se çfarë akuzash mund të ngriheshin apo nëse ai përballej me drejtësinë.
Madje, Rama tha se shoqërinë dhe miqësinë nuk ia përcakton Departamenti amerikan i Shtetit.
Kaq ka mjaftuar që delegatët të marrin një mesazh qoftë edhe përmes televizorit dhe t’a mbajnë mend ditën e votimit.
Tashmë, Dako me votën e tij si anëtar i Asamblesë Kombëtare do të zgjedhë anëtarët e Kryesisë së PS-së, sikundër ka shumë gjasa që të rikonfirmohet edhe vetë si anëtar i këtij forumi.
Emri i Dakos rezulton edhe në përgjimet e dosjes 339 të publikuar nga “Bild” lidhur me zgjedhjet në Qarkun e Durrësit. Pas tërmetit të 26 nëntorit pritej që organet ligjzbatuese të vepronin ndaj ish-Kryebashkiakut që drejtoi qytetin bregdetar për të paktën 3 mandate.
Vetë Dako për akuzat që i janë ngritur e ka quajtur veten “superman” dhe se duart e tij janë si akullore.
